နေပြည်တော် ဇန်နဝါရီ ၂၅

သမဝါယမနှင့် ကျေးလက်ဖွံ့ဖြိုးရေးဝန်ကြီးဌာန၊ ကျေးလက်ဒေသဖွံ့ဖြိုးတိုးတက်ရေးဦးစီးဌာနက လူထုဗဟိုပြုစီမံကိန်း(CDD) ဝန်ထမ်းများအား စီမံကိန်းလုပ်ငန်းများ အကောင်အထည်ဖော်ဆောင်ရွက်ရာတွင် အဆင်ပြေချောမွေ့စေရန် ရည်ရွယ်၍ လူထုဗဟိုပြုစီမံကိန်း စီမံခန့်ခွဲမှု စွမ်းဆောင်ရည်မြှင့်တင်ရေး သင်တန်းဖွင့်ပွဲအခမ်းအနားကို ယနေ့နံနက် ၁၀ နာရီအချိန်က ရုံးအမှတ် ၃၆ နေပြည်တော်၌ Video Conferencing စနစ်ဖြင့် ကျင်းပပြုလုပ်ခဲ့ကြောင်း သိရသည်။

ရှေးဦးစွာ ကျေးလက်ဒေသဖွံ့ဖြိုးတိုးတက်ရေးဦးစီးဌာန လူထုဗဟိုပြုစီမံကိန်းဒါရိုက်တာ ဒုတိယညွှန်ကြားရေးမှူးချုပ် ဒေါ်ညိုညိုဝင်းက အဖွင့်အမှာစကား ပြောကြားပါသည်။

ဆက်လက်၍ ကျေးလက်ဒေသဖွံ့ဖြိုးတိုးတက်ရေးဦးစီးဌာန လူထုဗဟိုပြုစီမံကိန်း ပြည်ထောင်စုအဆင့် သင်တန်းနည်းပြ National Training Expert ဦးအောင်မြတ်ကျော်နှင့် သင်တန်းနည်းပြများက သင်တန်းတွင်ပို့ချမည့် သင်ခန်းစာများကို ရှင်းလင်းပြောကြားပါသည်။

အဆိုပါ လူထုဗဟိုပြုစီမံကိန်း စီမံခန့်ခွဲမှု စွမ်းဆောင်ရည်မြှင့်တင်ရေးသင်တန်းကို ကျေးလက်ဒေသဖွံ့ဖြိုးတိုးတက်ရေး ဦးစီးဌာန (ရုံးချုပ်)ဝန်ထမ်းများ၊ ရှမ်းပြည်နယ်(တောင်ပိုင်း)၊ ရှမ်းပြည်နယ် (အရှေ့ပိုင်း)၊ ပဲခူးတိုင်းဒေသကြီး၊ ရခိုင်ပြည်နယ်နှင့် မောက်မယ်၊ မိုင်းခတ်၊ သဲကုန်း၊ ရွှေကျင်၊ ပုဏ္ဏားကျွန်း၊ ဂွမြို့နယ်တို့မှ စုစုပေါင်းဝန်ထမ်း ၅၀ ဦးကို ဇန်နဝါရီလ ၂၅ ရက်နေ့မှ ၂၈ ရက်နေ့ အထိ လေးရက်ကြာ ဖွင့်လှစ်သင်ကြား ပို့ချ ပေးသွားမည်ဖြစ်ကြောင်း သိရသည်။