တုံ့ပြန်နိုင်စွမ်းအားကောင်းသောလူထုဖွံ့ဖြိုးရေးစီမံကိန်း

၁။ နိဒါန်း

          တုံ့ပြန်နိုင်စွမ်းအားကောင်းသောလူထုဖွံ့ဖြိုးရေးစီမံကိန်း (Resilient Community Development Project, RCDP)ကို  ပြည်ထောင်စုသမ္မတ မြန်မာနိုင်ငံတော်အစိုးရ၊ စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန၊ ကျေးလက်ဒေသဖွံ့ဖြိုးတိုးတက်ရေးဦးစီးဌာနမှ အာရှဖွံ့ဖြိုးရေးဘဏ်၏ အထူးမဟုတ်သော ငွေလုံးငွေရင်းအရင်းအမြစ်မှ အတိုးသက်သာသောချေးငွေ အမေရိကန်ဒေါ်လာ (၁၈၅) သန်း၊ အာရှဖွံ့ဖြိုးရေးဘဏ်၏ အထူးရန်ပုံငွေအရင်းအမြစ်ဖြစ်သော သဘာဝဘေးအန္တရာယ် လျော့ချရေးရန်ပုံ‌ငွေမှ ထောက်ပံ့ငွေအမေရိကန်ဒေါ်လာ(၁၀)သန်း၊ ဥရောပသမဂ္ဂ၏ အာရှရင်းနှီးမြှုပ် နှံမှုပံ့ပိုးရေးအဖွဲ့မှ ထောက်ပံ့ငွေအမေရိကန်ဒေါ်လာ(၂၇.၅၈)သန်းနှင့်ညီမျှသော ယူရို(၂၄.၂၅)သန်း၊ ဂျပန်အစိုးရ၏ ဆင်းရဲမှုလျော့ချရေးရန်ပုံငွေမှ ထောက်ပံ့ငွေ အမေရိကန်ဒေါ်လာ(၃)သန်း၊ အစိုးရ In-kind ထည့်ဝင်မှု အမေရိကန် ဒေါ်လာ (၁၉.၃၇)သန်း၊ စုစုပေါင်း (၂၄၄.၉၅)သန်းဖြင့်  အကောင် အထည်ဖော်ခြင်းဖြစ်ပါသည်။ မြန်မာနိုင်ငံအတွင်းရှိ ချင်းပြည်နယ်၊ ဧရာတီတိုင်းဒေသကြီး၊ တနင်္သာရီ တိုင်းဒေသကြီး၊ စစ်ကိုင်းတိုင်းဒေသကြီးနှင့် နာဂကိုယ်ပိုင်အုပ်ချုပ်ခွင့်ရဒေသများရှိ မြို့နယ်(၁၇)မြို့နယ်၊ ကျေးရွာအုပ်စု (၇၉၁) အုပ်စု၊ကျေးရွာ (၂၉၄၂)ရွာ၊ လူဉီးရေ (၁.၈)သန်းကျော်အတွက် ကျေးလက် အခြေခံအဆောက်အအုံလုပ်ငန်းများ၊ အသက်မွေးဝမ်းကျောင်းလုပ်ငန်းများနှင့် ဝင်ငွေမြှင့် တင်ခြင်း လုပ်ငန်းများ၊စွမ်းဆောင်ရည်မြှင့်တင်ခြင်းလုပ်ငန်းများကို ဆောင်ရွက်သွားမည်ဖြစ်ပါသည်။

၂။ ရည်ရွယ်ချက်

          စီမံကိန်းရည်ရွယ်ချက်မှာ ရပ်ရွာလူထု၏ စွမ်းဆောင်ရည်မြှင့်မားရေးအပေါ်အခြေတည်၍ ဖွံ့ဖြိုးရေးလုပ်ငန်းများကို လူထုကိုယ်တိုင်ဆောင်ရွက်ခြင်းဖြင့် ကျေးလက်နေပြည်သူများ၏ မိသားစု ဝင်ငွေတိုးပွားလာစေပြီး လူနေမှုအဆင့်အတန်းမြင့်မားလာကာ သဘာဝဘေးအန္တရာယ်ရင်ဆိုင်တုံ့ပြန် နိုင်စွမ်း အားကောင်းလာစေရန် ဖြစ်ပါသည်။ စီမံကိန်းအကောင်အထည်ဖော်ဆောင်ရွက်ခြင်းဖြင့် သဘာဝဘေးဒဏ်ခံနိုင်သော အသက်မွေးဝမ်းကျောင်းအထောက်အကူပြု ကျေးရွာအခြေခံ အဆောက် အအုံများဖွံ့ဖြိုးတိုးတက်လာခြင်း၊ ဆင်းရဲနွမ်းပါးသည့် အိမ်ထောင်စုများအတွက် ရာသီဥတုနှင့် လိုက်လျောညီထွေရှိသော အသက်မွေးဝမ်းကျောင်း လုပ်ငန်းများကို ထောက်ပံ့ပေးခြင်းဖြင့် မိသားစု ဝင်ငွေတိုးပွားလာစေခြင်း၊ အစိုးရအဖွဲ့အစည်းများနှင့်ကျေးလက် နေပြည်သူများ၏ သဘာဝဘေး အန္တရာယ်ရင်ဆိုင်တုံ့ပြန်နိုင်သည့် စွမ်းဆောင်ရည်မြှင့်မားလာ စေခြင်းစသည့် အကျိုးရလဒ်များခံစား ရရှိမည်ဖြစ်ပါသည်။

၃။ စီမံကိန်းအစိတ်အပိုင်းများ

                   ဤစီမံကိန်းတွင် အပိုင်း (၃) ပိုင်း ပါဝင်သည်။

အပိုင်း-၁ ။   သဘာဝဘေးဒဏ်ခံနိုင်သော အသက်မွေးဝမ်းကျောင်း အထောက်အကူပြု ကျေးရွာအခြေခံအဆောက်အအုံများ ဖွံ့ဖြိုးတိုးတက်လာစေရန်၊

အပိုင်း-၂။ ဆင်းရဲနွမ်းပါးသည့် အိမ်ထောင်စုများအတွက် ရာသီဥတုနှင့်လိုက်လျောညီထွေ ရှိသော အသက်မွေးဝမ်းကျောင်းလုပ်ငန်းများကို ထောက်ပံ့ပေးခြင်းဖြင့် မိသားစု ဝင်ငွေ တိုးပွားလာစေရန်။

အပိုင်း-၃။ အစိုးရအဖွဲ့အစည်းများနှင့် ကျေးလက်နေပြည်သူများ၏ သဘာဝဘေးအန္တရာယ် ရင်ဆိုင်တုံ့ပြန်နိုင်သည့် စွမ်းဆောင်ရည်မြှင့်မားလာစေရန်၊